A Poi Tuk E: Wa (UWSA) Hriamtlai Le Kawl Ralhrang Biakamnak An Ngei, State Kan In Pek Hna Lai An Ti

Tlangcung Hriamtlai lak ah a thazaang a tthawngbikmi Wa hriamtlai UWSA le Kawl ralhrang hna cu biakam minthutnak an nei i, Kawl ralhrang hna nih State kan in pek hna lai tiah biakamnak an pek hna. Wa hi Shan state ah a ummi an si i, Kawl ram nakin Tuluk nih a control deuh mi an si tiah theih a si. Atu bantuk an i ton hi

September 26 ahkhan a si i, policy ning in cun kap hnih lungtlin a si. Asinain Hlutdaw lei kap in le phunghram hna in remh kan i zuam lai. Atu ah kan remh khawh colh lo nain Hlutdaw a um than tik ah Kawl ralkap hna nih atu kan biakammi lungtlin mi hi kan dirkamh lai tiah Ralhrang  biachimnak nawlngei tu Zaw Min Htun nih a chim. Crd : BBC

Atu bantuk in biakam an ngeihmi cu Tlangcung mi hriamtlai dang hna karlak ah i thencheunak le Pau dothlennak a hnorsuan ngai lai tiah ruah a si. Aruang cu Wa hi PDF le tlangcung hriamtlai dang hna hriamnam in a zuar tu le a bawmtu an si tiah theih a si. Wa cu an miphun dihlak milu 800000 renglo an si i, ralkap 30000 a ngeimi a si, Vanlawng kahnak siseh, hriamngan tampi a ngeih lawng si loin, Hriamnam sehzung zong a mah tein aa ngeih. Amah tein aa ukmi a si i, Kawl ralkap hi an ukmi ramchung ah an um lo tiah theih a si. An holh ah Tuluk ca le Wa holh an hmang i, an phaisa le Tuluk phaisa an hmang bik tiah theih a si.

Wa hriamtlai hna nih atu bantukin Ralhrang he lungtlinnak an neih tik ah Tlangcung hriamtlai dang hna zong nih Kawl ralhrang he i ton hi an hnabei a sei cio lai maw timi hi ruah lo awk tha loin a um than cang.