BREAKING NEWS: Tedim Peng Ah Motor Pakhat Khorchung I A Tlak Caah Minung 2 Nunnak A Liam!

Tedim Peng Ah Motor Pakhat Khorchung I A Tlak Caah Minung 2 Nunnak A Liam!

June 20 ah khan Chin ramkulh, Tedim peng Tungzaang (သုန်းဇန်) khua in Kalay lei ah a kalmi motor pakhat cu Dimlo(ဒိမ်လို) khua pawng a phanh ah ruahlopi in aa let i, khor thukpi chung i a tlak caah motor chung cuangmi minung 2 an nunnak liam i, 6 hliam an tuar, tiah theih a si.

Motor cu lamkam khor ft’ 600 leng a thuhnak hmun ah a tla i, motor chung cuangmi minung 8 cu an dihlak in Tedim siizung ah kalpi an si. Hliam faak deuh a tuarmi minung 4 cu Kalaymyo ah ah kuat an si i, cu zaan suimilam 9:30 ah Thang Khua Cin Tawng cu lampi ah a nunnak liam tiah theih a si.

A taangmi mizaw 3 cu Kalaymyo siizung ah kalpi an si i, Tual Zam cu Mandalay siizung ah an lanhpi. June 21 ah Mandalay siizung lampi ah U Tual Zam cu a nunnak liam ve. A dang hliam tuarmi mizaw 6 cu dam lei an panh tiah theih a si.

 Aung San Suu Kyi Cu Naypyidaw Thonginn Pakhat Ah Ṭhial A Si!: State Counsellor of Myanmar Aung San Suu Kyi cu nihin June 22 chunhnu in Naypyidaw ah, a dang tein sak mi thonginn pakhat ah ṭhial a si, tiah min langhter a duh lomi pakhat nih RFA thawnglatu sinah an chim. Suu Kyi an ṭhialnak hmun hi amah ca hrim ah a dang tein an sak mi a si, tiah theih a si.

Suu Kyi kong a chimtu nih cun, “Amah chiahnak hrimhrim ah sak mi inn pakhat a um i, cuka hmun ah cun an kalpi. A cawngtu le a zohkhentu ding cu zeitin an tawlrel lai, theih a si rih lo. Thonginn thar ah ṭhial a si ding mi cu ni zeimawzat ah khan kan theih cang. SAC ralkap lei nih Suu Kyi an ṭhialnak aruang cu amah pumpak himnak ca ah le zei dangdang kong ah a si tiin an thanh,” tiah a chim.Suu Kyi case pawl cu a ra lai mi June 23 in Naypyidaw tonginn ah biaceih ding in SAC ralkap lei nih timhtuahnak an ngei tiah biaceihzung ṭuantu hna nih thawnglatu hna sinah an chim. Suu Kyi Sihni(lawyer) pawl zong biaceih caan a phak lai cang caah Naypyidaw ah ra ding in SAC nih thawng an thanh cang hna tiah RFA thawnglatu nih a chim.Aung San Suu Kyi Naypyidaw thonginn thar ah ṭhial a si kong he pehtlai in General Zaw Min Thun cu RFA nih a pehtlaihnak an tuah ko nain bialehnak a pe rih hna lo, tiah theih a si.Source: The Chin Post.