Cawn Awk Tlak Falam Lungput Halkha Pa Veve Rev. Dr. Hre Kio Le Dr. Tluang Cung Thang Kong Ah Mahti Hin An Van Chim

Cawn awk tlak Falam lungput

Falam kan unau hna nih Rev. Dr. Hre Kio le Dr. Tluang Cung Thang an conglawmh hna ning le an cawisan hna ning hmuh tikah uar an um tuk. An caah thiltha a tuahtu mitha cu kokek an si le silo zoh loin upat an phut zat in upat an pek hna timi fiang tein hmuh khawh a si.

An cawisan hna i dawtnak an theihthiam caah Rev. Dr. Hre Kio le Dr. Tluang Cung Thang zong an i lawm i Falam cung ah dawtnak an ngei chinchin ve. An chuah semnak an khua nak hmanh in Falam cung ah siaherhnak le dawtnak an ngei deuh lai. Dawtnak kha dawtnak in an lehrulh khawh caah a fek bikmi tlaihchannak a chuak tawn.

Kannih Hakha le Thantlang lei cu dawtnak he thiltha a tuahtu hna kha conglawmh ‘appreciate’ kan hmang hna lo. Pakhat nih dawtnak lungthin tak in thil a tuah hmanh ah ‘pakhat khat ngah a duhmi a um caah a si ko lai cu’ tiin lunghrinh in thangchiat kan hmang. I lawmhpi kan hmang lo, a hlawh tling deuh poah kha doh le ral kan hmang. Thil tha tuah tikah appreciation hmanh ngah loin thangchiat lehlam i huah tawn a si tikah thiltha tuah aduhmi zong an tha thawh lo caan a tampi lai, cucu miphun kan sunghnak nganpi pakhat a si ve.

Pengtlang dang in mitha pakhat khat nih Hakha ah thiltha rak tuah sehlaw thangthat a tonmi nak in thangchiat ai huahmi a tam deuh men lai. Hakha kek a si lo ti phun khin chim a um pah lai. Cutikah, voikhat cu thiltha a tuah ko men lai nain appreciation lungthin a ngei lomi hna sin ah mitha tam deuh an thlatla kho lai lo, thiltha tuah an thatho lai lo, a kan kaltak colh than lai.

Pathian zong nih a kan dawt caah a kan dawtnak kan theihthiam ’appreciate’ ding kha a kan duhpi, a dawtnak kan theihthiam lo caan ah ai lawm ve lo. A sermi minung cu kan tling lo caah thiltha tuah caan ah conglawmh a duh tukmi kan si hna.

Tuhnu cun Falam kan unau lungput hi i cawn ve cang u sih. Hnahchuahnak lungput hrial in conglawmnak ‘appreciation’ tu hi hmunhma pe deuh cang u sih — kan thancho deuh nak hnga. Catialtu: Salai Lungthlitum.

 

Kanpetlet nih SAC kuttang riantuantu hna cu ralrin an pek hna!!

2021 February 1, SAC nih hramhram uknak an lak ni thokin, Kanpetlet peng chung mipi hna nih SAC uknak cu kan cohlan khawh lo caah, belkheng tum in siseh, lamzawh in siseh, cozah riantuantu hna nih an rian kaltaakin CDM an tuahnak in siseh, mipi hna nih a phunphun in duhlonak kan langhter.

Cu duhlonak langhter in lam a zawhtu mipi hna cu hriamnam hmangin a kan thenthek dih caah, CDF-Kanpetlet nih hriam kan i tlaih i, SAC cu kan doh hna.

SAC nih hin an uknak a hmunh khawhnak ding caah, ramkhel, ukhruainak le thanchonak timi tlangtar bunh in Kanpetlet khuachung ah riantuan le cawlcangh an i zuam caah inn hra uk, inn za uk tiin khuabawi minung 19, meilei in minung 7, Red cross in 7, a dang minung 13 hna cu an riantuan dingin tuanvo an in pek hna pinah a herh ah cun hriamtlai ding tiang in tuanvo an in pek hna cu kan theih i, cu SAC rian a tuanmi minung zong fiang tein kan in theih cang hna.

Cu caah, CDF-Kanpetlet nih mipi caah nunnak a petu ralkap, tlaihkhih le thah a tongmi kan mipi hna caah, cu SAC he riantuantu nan dihlak a ra laimi October 15 tiang kan in hngah hna lai i cu chung ii CDM tuah duh loin pehtlaiin SAC kuttang riantuantu poh cu kan in hmuh hna nak poh ah a herh ningin hma kan in lak hna lai CDF-Kanpetlet nih nihin September 29 ah cathanh an chuah.