CDF Nih Ralhrang Raltuknak Vanlawng Aa Hel caah Dornak Timhtuah Cio Ding in Theihternak an Tuah!
Mindat Peng Ah Raltuknak Vanlawng Aa Hel! Lakhruak In I Dornak Timhtuah Cio Ding in CDF Nih Theihternak an Tuah!
Mindat pengchung ah SAC ralkap nih vanlei kahdohnak an tuah sual ah, i dor khawhnak le humhimnak ding ah bomb khor i cawh cio ding in CDF – Mindat nih nihin August 29 ah mizapi sin theihternak tuah.
Mindat pengchung ah ral tuknak vanlawng cu niam tein an zuan caah mizapi le hriamtlai phu hna i ralring ding in atu bantuk in lakhruak in cathanh an chuah. Mibupi in um ti bantuk hrial ding in le lakhruak in thil a can tikah i dor khawh colhnak ding ah bomb khor i cawh cio ding in CDF-Mindat nih cun tualchung mi an theihter hna.
Atu lio te ah cun Mindat pengchung ah kahdohnak a chuak lo nain, SAC ralkap hna nih khuapi chung ah innchungkhar cazin check hlatnak an tuah, tiah theih a si.A luancia July thla ah khan Mindat tualchung hriamtlai phu le SAC ralkap kar kahdohnak a um lo nain, SAC ralkap hna nih vanlei in kahdohnak an tuah caah CDF chungtel le tualchung mi lak ah a thi mi le hliamhma tuar an rak um, tiah theih a si.
Source: The Chin Post
CDF-KKG Le Ṭangrual Phu Hna Nih SAC Ralkap 3 An Thah Hna
Nihin August 29 zing sml 10:00 ah Myintthar Se(မြစ်သာဆည်) phura in EPC zung ah humhimnak a lami SAC ralkap 3 cu CDF-KKG Battalion 5, YDF-14 le PDF Battalion 7 nih nihnih chung an ngiat hna hnuah an thah hna, tiah theih a si.SAC ralkap 3 cu cycle 2, meithal he an uniform hruk loin EPC zung chung ah an lut i, zung chung ah cun an kah hna, tiah theih a si.
An hriamnam kan laak hnik lio ah kan hnu lei in bawmtu SAC ralkap an rat caah an hriamnam laak manh loin hnu kan kir ṭhan. Kanmah lei in a thimi le aa hliammi kan um lo, tiah cathanh an chuah.Atu bantuk in SAC ralkap kan kah hna hi Yaihtharkone(ရိပ်သာကုန်း) kahdohnak ah a thimi PDF ralkap hna ca ah lehrulhnak kan tuahmi a si, tiah an langhter. Source: The Chin Post