Hakha Chungkhar 2 Ralhrang nih an Thawl hna i Inn an Hrenhpiak Chap Rih

Dawrhlun Chungkhar Pahnih SAC Ralhrang nih an Thawl hna i Inn an Hrenhpiak hna. Nizaan March 21, Hakha, Dawrhlun sang ah chungkhar a um liomi inn 2 cu SAC ralhrang nih an tthawl hna i an inn kutka an hrenhpiak hna, tiah thawng kan theih.

“Inn 2 in chungkhar a um liomi an si. An thilri an lakter hna i an inn in an tthawl hna hnu ah kutka an hrenh,” tiah Hakha khuami pakhat nih The Chin Journal ah a chim. Inn 2 an chuhmi hna lak ah inn pakhat hi SAC ralhrang nih kan hnu thla ah an rak tlaihmi Hakha mino pakhat i a chungkhar an si.

An chuhmi hna hi palik zung pawng ah a ummi inn khat le Dawrhlun tawlei ah a ummi inn khat an si. Source: The Chin Journal.

Myanmar Ralkap nih “Miphun Cihmih Thahnawnnak” an Tuah tiah US nih Fehter

Min Aung Hlaing hruaimi Myanmar ralkap nih “Miphun Cihmih Thahnawnnak” (Genocide) an tuah, tiah US cozah nih nihin March 21 (Myanmar Time) ah thawngthanhnak a tuah. 2017 ah a rak cangmi Rohinyga pawl thahnawnnak kong he pehtlai in US nih “Genocide” timi biafang a rak hmang ballo nain atu ah a hun hman hi a si.

US nih atu bantuk in thawngthanhnak a tuah tik ah vawleicung biaceih zung ah fawi khun in Myanmar ralkap tazacuai khawh a si cang lai, tiah nuhrin covo zatlangbu hna nih an chim. 2017 Rohingya thahnawnnak ah minung tampi an nunnak a rak liam i, atu tiang ah Rohingya milu 730,000 hrawng ralzaam dirhmun in Bengladesh ram ah an um hna.

US Democratic Senator Jeff Merkley nih, “Biden cozah nih atu bantuk in biachahnak a tuahmi cung ah lunglawmhnak nganpi ka ngei. Biachahnak tuah awk ah caan saupi rak rau ko hmanh sehlaw atu bantuk in biakhiahnak an tuah khawhmi nih hin Myanmar ralkap dantatnak kong ah hmual a ngeihter khun cang lai,” tiah CNN ah a chim. Myanmar ralkap nih Rohingya miphun cung ah “Miphun Cihmih Thahnawnak” a tuah timi thawngthanhnak cu Washington khua i, US Holocaust Memorial Museum ah US ramleng vuanci Antony Blinken nih a tuah.Source: The Chin Journal.