KNDF Nih Ralhrang Cawlcanghnak CATHANH An Chuah!

Loikaw Khuapi Chung Kahdohnak Ah SAC Ralhrang Nih Vanlawng (2) Hmangin Vawi (9) Bak An Kah!

January 11 ah Kayin ramkulh Loikaw khuapi ah SAC ralhrang ralkap nih raltuknak vanlawng (2) bak hmangin vawi (9) chung an kah tiah KNDF nih cathanh an chuah.

Loikaw khuapi chung Yua Taan Syi le, Myine Lung ahcun zinglei sml 8:00 thawkin kaphnih kahdohnak a fak ngaingai.

SAC ralhrang ralkap leikap ah a thimi le hliammi an tam ruangah zanlei sang sml 17:45 ah raltuknak vanlawng pahnih bak hmangin vawi (9) chung bak an rak kah tiah thawng theih a si.

Kahdohnak caan chungah SAC ralhrang ralkap (20) hrawng an thih caah hriamngan fami pathum, hriamngan pakhat, hriamngan kuanfang le hriamhme kuanfang tampi an chuh khawh hna.

SAC ralhrang ralkap hna nih Myine Lung sangah a ummi minung umnak inn pawl cu mei khangh in an hrawhpiak hna.

Cu kahdohnak ahcun SAC ralhrang ralkap kut in KNDF ralkap pakhat nih ram caah a nunnak a liam.

Federal Democracy caah nunnak a pekmi ralkap cu KNDF nih pasaltha a si tiah upatnak kan pek tiah KNDF nih cathanh an chuah.

Zinglei caan ah Brigate 66, Battalion 108 in a rak zaammi SAC ralhrang ralkap pathum hna cu kut in chehmi bomb pakhat he kan tlaih hna caah (KSP) sinah kan up cang hna.

Loikaw khuapi chungah mipi hna cu a lamkip in hrem in thahnawnnak tuahtu SAC ralhrang ralkap hna cu KA, KNDF, PDF hna i fonhin kahdohnak an tuah cuahmah tiah theih a si.

SAC ralhrang ralkap hna cu khuapi chung kahdohnak ah hin mipi hna cu timh ciam tein an kah hna pinah mipi umnak inn zong bomb thlak in mei an khangh, tibantuk hna cu pehzulh in an tuah peng ko tiah KNDF nih cathanh an chuah.

Credit: The Federal Times + Than Lwin Khet News