Lung a faak tuk: Yangon Rawldawr Riantuantu nih PDF Ralkap an Tlaih i an Thah

Yangon Rawldawr Riantuantu nih PDF Ralkap an Tlaih i an Thah. January 21 ah khan Yangon ramtthen North Kokkalapa, Thanthumar lam ah a ummi Ngwetaung timi rawlawr riantuantu pawl nih PDF ralkap pakhat cu an tlaih hnu ah an thah, tiah Kawlram chung Media tampi nih an langhter.

Hi PDF ralkap hi Freeland Attack Force chungtel a simi Ko Thar Din a si, tiah FLA nih fehternak zong an tuah. January 21 ah Ko Thar Din le a hawi pakhat nih Ngwetaung rawldawr pawng ah a ummi sang uknak zung cu bomb in an cheh i an zaam.Cuti an zaammi a hmutu Ngwetaung rawldawr riantuantu pawl nih tlaih ding in an dawi hna. Ko Thar Din nih thawngpang bomb a puah i a hawipa cu a zaam kho. Asinain, amah belte hi zaam kho loin rawldawr riantuantu pawl nih an tlaih.

January 22 ah SAC ralhrang a dirkamhtu Telegram Channel pawl nih Ko Thar Din a thihnak kong an thanh. FLA zong nih kan ralkap a si, tiah nihin ah theihternak an tuah ve.Ko Thar Din a tlaitu pawl rian an tuannak Ngwetaung timi rawldawr hi SAC ralhrang bawi pakhat chungkhar nih an ngeihmi a si, tiah Kawl Media pawl nih an langhter.

Atu bantuk in Ko Thar Din tlaihkhih le thah a ton hnu ah Yangon khuachung ah a cawlcangmi Urban Guerilla  PDF ralkap bu pawl nih lehrul chamnak kan tuah hrimhrim lai, tiah cathanh an chuah hna.Crd: The Chin Journal

relchap

Mindat Peng Ah Ralhrial In An I Dornak Pungki Sianginn SAC Jet Fighter Nih Bomb A Thlak. Chin ramkulh, Mindat peng ralhrial in an i dornak Paleikhtwe khua phungki sianginn cu SAC Jet Fighter nih a voihnihnak bomb in an thlak, tiah Mindat peng ukhruainak phu sinin theih a si.January 23 zing sml 11:00 hrawngah kahdohnak zeihmanh um loin SAC vanlawng nih bomb a thlak caah phungki sianginn le khuami inn 2 a rawk. Cu hnu sml 12:00 hrawng zong ah Mindat khua ah hram a bunhmi SAC ralkap nih hriamngan in an kah chap, tiah theih a si.

SAC ralkap nih biaknak he aa pehtlaimi inn le ralhrial in a zammi hna bawmchantu a kahmi hna hi minung lungthin pu lo nih thil an tuahmi bantuk a si, tiah Mindat peng ukhruainak phu nih an langhter.January 22 lio zong ah SAC ralkap nih kahdohnak zeihmanh um loin Mindat peng Suntaung khua cu Jet Fighter in bomb lung 2 in an thlak pin hriamngan in an kah chap caah tualchung mi pahnih hliamhma an pu i, inn zong a rawk, tiah theih a si.