Malaysia Ah kal Aa Tim Mi Tlaih An Tong ( A Poi Tuk ee)

Malaysia Ah kal Aa Tim Mi Myanmar Mi 41 Thailand Ah Tlaih An Tong!: Phung ning lo in Malaysia ah rianṭuan ding in a kal mi Myanmar rammi 41 cu Thailand ram thlanglei Hatyaing(ဟတ်ယိုင်) pengkomh ah Thai palik nih an tlaih hna, tiah theih a si. Thawng theih ning ah Hatyaing pengkomh rianngeitu, Department of Immigration le Thai palik hna nih Myanmar ram mi pawl an i thuhnak ramlak ah an kawl hna i, atu bantuk an tlaih hna, tiah theih a si.

Rianngeitu hna nih zankhuadei an bawh hna i June 5 chunhnu Sml 2 ah mawṭaw(pick-up) 2 ah aa thup mi Myanmar mi hna cu palik nih an tlaih hna, tiah theih a si. Tlaih a tong mi minung 41 chung ah cun pa 37 le nu 4 an si. Mawṭaw khaltu Thailand mi 2 zong tlaih chih an si. Myanmar mi hna nih hin Malaysia ramri an phak khawh nakhnga mawtaw khaltu sin ah Bath 7000 cio an pek hna, tiah palik nih an chim.

Tlaih a tong mi hna cu palik sin ah an um rih i, phung ning lo in rian a ṭuan mi midang tlaih khawh an si nakhnga hlathlainak an tuah lio, tiah theih a si.

Model Le Lemcang Thiam Thin Zar Wint Kyaw Cu SAC Ralkap Nih An Tlaih!: Shan State Progressive Party(SSPP) chairman fanu ṭhitumhnak ah a kalmi lemcang thiam minthang Thin Zar Wint Kyaw cu a kir lei ah SAC ralkap nih chekhlatnak gate pakhat ah an tlaih, tiah theih a si.

Model le Lemcang thiam Thin Zar Wint Kyaw cu July 4 ah, Shan State Progressive Party(SSPP) chairman fanu ṭhitumhnak puai zanriah dumnak ah Shan State Army(SSA) ralkap thuam he a kalnak cu social media ah a langsar ngai in hmuh a si caah tlaih a si.Lemcang minthang Thin Zar Wint Kyaw cu SSPP/SSA sawmnak in Haiper tisor le Shan ramkulh chaklei KyayTi(ကျေးသီး) peng, WamHai(ဝမ်ဟိုင်း) ṭhanchonak ding caah Documentary thlak ding in a kal mi a si. July 3 ah Video thlak hram ai thawk i, an dih hnu an kir lei ah vedio ai thlaknak thilthuam he ṭhitumhnak puai zaanriah dumnak ah a telpi hna.

Thin Zar Wint Kyaw nih cun zeidang ramkhel lei tinhchih in thlakmi a si lo, fimcawnnak, ngandamnak lei ah le ṭhanchonak ding ca ah zuk thlak ding in SSPP nih sawmmi ka si, tiah SSPP Info ah July 4 ah a rak chim.Zuk thlak an dih hnu nihin July 6, zinglei ah WamHai(ဝမ်ဟိုင်း) khua chuah Mairel(မိုင်းရယ်) gate ah Thin Zar Wint Kyaw zulhmi motor cu SAC ralkap nih rak chek in, tlaih a ton hi a si, tiah tualchung mi nih an chim. Thin Zar Wint Kyaw tlaih a tonnak kong he pehtlai in SAC ralkap le SSPP nih thawngthanhnak an tuahmi a um rih lo. SSPP cu nawlngeihnak latu SAC nih a sawmmi tonbiaruahnak ah aa telmi a si. Source: The Chin Post