May 7 Ralhrang ralkap cozah hrawh dingin raldoh aa timmi ================= mino hna raldoh cawnnak cu ramri hmun pakhat ah

Ralhrang ralkap cozah hrawh dingin raldoh aa timmi mino hna raldoh cawnnak cu ramri hmun pakhat ah May 7, cawn niruk ni, tuzing ah thok a si cang tiah theih a si. Hi raldoh cawnnak ah chimtu le hruaitu cu MAH sinin a zammi ralbawi Hein Taw Oo a si.

“Kan zatein i uah a ngah lo, kan zatein ral a domi kan si timi lungthin ngei in teinak kan hmuh tiang kan kal lai. Thaizing niruk ni zinglei 5:00 am in 7:00 am karlak ah kan thok cang lai. Timhtuahnak ah thlakhat kan rau. Thaizing thok in a herhmi raldoh thiamnak, sii lei thiamnak le ramleng he pehtlaihnak lei thiamnak siseh seh lei thiamnak le minung pakhat le pakhat i pehtlaih thiamnak tiangin aa tel lai. Atu hi ram thatnak a duhmi thiamsang tampi kan i funtom cang tiah” tiah nizan i RFA he biaruahnak ah Ralbawi Hein Taw Oo nih a chim.

MAH sin in a zam vemi Boci Lin Htet Aung zong nih “A biapi bik cu hi mino hna hi an lungthin a thawng.  Raldoh lei ah cun thiammi an ngei lo. Raldoh hi thla 4 hrawng cawn tawnmi a si. Asinain atu cu Army ser zau kan duh caah cawn caan a tawi deuh kho. Mino hna hi a si khawh cungin an i zuam ko. Cheukhat cu siangngakchia an si. Khuapi chungah ca a cawng i ram dawtnak lungthin he raldoh aa timmi an si. Cawn caan tawi ko hmanhseh ka doh taktak tikah lungthin thawnnak kha biapi ah chia in kan tei ko lai. Kan lungthin a thawn ahcun ralhrang hna hi a rauh hlanah kan tei ko hna lai. Hlawhtlinnak kan hmuh ko lai” tiah a chim ve.

Raldoh cawng dingin a ra vemi Kawl mino pakhat nih cun hitihin a chim.

“Kan ram ah zalong tein kan um khawh lioah khan cun tlangcungmi hna temtuarnak kha kan rak zum lo. Fiang tein chim ko ahcun tlangcungmi timi cu hriamnam tlaih in dohdalnak a tuahtu timi ruahnak in kan rak zoh hna. Asinain hika kan phak tikah MAH nih ralhrang tiah a rak timi tlangcungmi hna hi anmah nakin lungthin lei ah an rak sang tuk. An temtuarnak le sunghmi a rak tam tuk, chim cawk a si lo. Sul le lam, nunphung, fimcawnnak le chawkhel lei…hi vialte ah namneh le sersat an rak tong. Tlangcungmi hna lungthin hi a thianghlim tuk. Kanmah zong lungthin thiang tein an kan don. Hi bantuk kan hmuh tikah kan lung a tha lo taktak”.

Raldoh a cawngmi tlawm-tam le cawnnak hmunhma cu chim le langhter an duh rih lo tiah theih a si.

#RFA