Ngaih A Chia Ko E: Tuchun Ah Kawl Ralkap Kahnak In Mipi ralkap Tam Taktak Hi Zat Bak Hi An Thi
October 10: Sagaing ramthen,Shwebo District, Watt Lat peng le Thant See peng chung ah Kawl ralkap nih vanlawng in a kah hna i, PDF minung hi zat bak hi na thi tiah theih a si. A thi mi minung zat an chimmi cu, Nizan October ni 8 ahkhan Phayyalaykung pawng hrawng cu
Kawl ralkap nih Jet vanlawng in bom voi li a thlak pin ah Kawl ralkap a van thlak hna i, cuticun biatak tein an kah hna caah PDF lei in minung 8 an nunnak a liam tiah theih a si. Minung 8 lawng hmanh si loin PDF lei in a lotlau mi an um nolh lai zumh a si e tiah an chim. Cun chunlai suimilam 12pm
hrawng ahkhan Shwebo District, Thant See peng Kawl ralkap hna le PDF karlak kahdohnak a chuak than i, PDF mipi ralkap lei in minung 7 an thi ve than tiah MDF-Hydra nih an thanh. PDF-Hydra le Kawl ralkap hi minutes 45 chung hrawng an i kap tiah theih a si. Kawl ralhrang lei nih
hriamnam ngam, Kuanrual Setlat he Khuachung lei cun din lo bak in an kah thluahmah caah khuachungmi han cu emergency in an zaamter hna i, a thi a hliammi cu an um rih lo, nain PDF lei cun minung 7 an nunnak a liam e tiah PDF lei nih cun an thanh. Watt Lat khua i PDF sakhaan cu Kawl ralkap hna nih an hrawh dih tiah theih a si fawn.
Lungcawi Khuami Pahnih Cu Niruk Chung Pehtlaih Khawh An Si Ti Lo: Chin ramkulh, Hakha peng Lungcawi khuami pahnih cu kawl lei ah Ar phiar dingin an kal ni thok in nihin tiang pehtlaih khawh an si ti lo. Lungcawi khuami Pu Zaw Ni le Pu Bawi Kham(chuah kehnak Lamtuk) cu kawl lei ah
Ar phiar dingin a luancia October 3 lioah cycle in an kal i, nihin October 8 tiang chungkhar nih an pehtlai kho ti hna lo, tiah theih a si. Shwebo khua ah Ar phiar dingin October 3 ah an kal i cu ni ah an chung le nih phone an chawnh hna i, kawlmi nih an tlaih nain phone cu an phih ṭhan colh peng i, nihin October 8 tiang pehtlaih khawh an si ti lo.
Pu Zaw Ni le Pu Bawi Kham cu Gangaw peng Hnankha khua PDF check gate an phanh tiang theih a si. Cu hnuah khoika lei dah an kal ti cu hngalh a si ti lo.
Cheukhat nih cun Hnankha khua pin lei hi cu pyusawhti le SAC ralkap an tamnak hmun a si caah an thah khawh men hna, tiin an zumh ko nain thawng fiang theih a si lo. Social Media ah pyusawhti nih an thah hna timi thawng fiang lo a len caah Pu Zaw Ni le Pu Bawi Kham hna chungkhar cu an lungre a thei, tiah theih a si.