Nihin Hakha ah 5 tluk an tlaih chap hna

CDF Hakha nih lakmi Surkhua Myo Palek Sakhan a ummi, Palek le Ralkap cu Bungzung ah thong an thlak hna; Nihin Hakha ah 5 tluk an tlaih chap hna
TCP Hakha – 2021 May 9

Chinland Defense Force, Hakha (CDF-Hakha) nih, nizaan May 8 ah an lak mi Hakha peng, Surkhua Myo i Palek Sakhan in a tlizaam mi Palek le Ralkap [minung 11] cu an tliknak Bungzung khua, Hakha peng ah [nizaan, May 8 ni thawk in] anmah State Administration Council (SAC) Palek nih thongthlak in an hren dih hna tiah kan theih.

An tliknak ah an pal pah mi khua pawl in, a hmu mi nih minung 11 an si. Palek le Ralkap tiah then in zeizah set an si cu kan hngallo, nain an zapi cun 11 an si ko tiah an chim.

Mi cheukhat chim nak ah, Palek a tli mi hi 7 an si i, Ralkap hi 4 an si tiah theih a si.
Nihin ah an tlik ruang ah thongthlak mi Palek le Ralkap chung in ahohmanh kan tong kho hna lo. Tonnak nawl an kan pe lo. Khua mi le upa nih ton ding in chawnh biak zong ah tonnak nawl an pe hna lo tiah theih a si. Tonnak nawl a haltu nih, “a ce-choh bantuk in an chiah hna caah tonak le chonhbiak nak nawl an kan pe lo” tiah a chim.
Surkhua Myo i Palek sakhan ah tuanvo ngan bik tlaitu cu Kawl a si, nain tutan ah a tli mi chung ahhin Laimi zong an i tel tiah kan theih.

Tlaihkhih thawng; Hakha
Nihin May 9 ni ah, Ralkap nih Hakha ah tlaih khihnak an tuah than. Hakha khuachung ah siseh, Nawi le a kiangkap ah a um mi le a chawklet mi an tlaih hna.
A tu tiang ah, an tlaih mi hna hi minung 5 an si cang tiah kan theih. Nain, The Chinland Post bel nih, a hodah an tial mi an si timi fehternak kan tuah kho rih lo.

CDF Hakha le Kanpetlet
CDF Hakha nih May 8 ah an lakmi silo ah an hrawh mi Surkhua sakhan ah a ummi inn 4 le thilri le catlap cheukhat cu kan khangh tiah cathanh ah an langhter.

CDF Hakha lawng silo in, CDF Kanpetlet zong nih, Mizapi umkalnak ah Ralkap nih Meithal ken in chawhlehnak, Mizapi nih zalong tein chawhlehnak nawl ngeih mi hnursuan in zaantlai hnu ah, check nak nan tuah le cozah a nuar mi hna CDM a tuah mi pawl nan hnuarsuan hna a si ahcun, kan duh lai lo, kahdohnak kan in tuah hna lai tiah May 8 ah thanh nak an tuah cang.