Nihin zanlei sml. 5:00 hrawng ah Laimi pa pakhat nih

Laimi Pa nih SAC Palik aa Hruaih Hna i Nawi ah Pu Ro Cung an Tlaih

Nihin zanlei sml. 5:00 hrawng ah Laimi pa pakhat nih SAC palik pawl Nawi ah a kalpi hna i Pu Ro Cung (Kum 65) an tlaih, tiah naihniam hna sin in thawng kan theih.

Pu Ro Cung hi Nawi ah Lo tuah in a riakmi a si. SAC palik a rak i hruaihtu Laimi pa (a min kan thei lo) nih Pu Ro Cung sin ah meithal ka pek, tiah SAC palik pawl a chimh hna.

Upa pakhat nih, “Mah pa hi Pu Ro Cung zong nih a theihmi a si lo. Kanmah zong nih kan theih balmi a si lo. Palik pawl a rak i hruaih hna i Pu Ro Cung sin ah meithal ka pekmi a um tiah a chimh hna. Cun, meithal kan pekmi chuah tiah Pu Ro Cung a hal,” tiah The Chin Journal ah a chim.

Palik nih Pu Ro Cung a riahnak thlaam cu an check i thilri an leh dih nain zei meithal hmanh an hmu lo. Asinain, Pu Ro Cung cu an tlaih i an kalpi.

Nihin zaanlei ah Nawi ah Pu Ro Cung, Pa Tial Thawng Ling, Pu Tler Ling le a hawile pahnih tiin minung 5 an tlaih hna, tiah kan theih.

The Chin Journal

May 9, Hakha

relchap:

Hakha ah Bomb a Puak

Hakha ah nihin zinglei sml. 9:15 hrawng ah bomb voi 1 a puak. Aa hliammi an um le um lo theih a si rih lo.

Bomb a puahnak hmun hi Myanmar Economic Bank hmai, Uknak lei zung (ထွေအုပ်) Quarter i motor fimnak (Parking) ah a si.

SAC palik le ralkap pawl zong an rak phan.