Nizaan, May 27 Thantlang khuachung kahdohnak ah Ralhrang Ceilak an Thi

Thantlang Kahdohnak Ah SAC Ralkap 6 An Thi: Nizaan, May 27 Thantlang khuachung kahdohnak ah SAC ralkap 6 an thi i hliamtuar an tam tiah CDF Thantlang nih a thanh

”2022 May 27 zanlei suimilam 5:20 in 9:00 tiang Thantlang kawl ralhrang sakhan le Palek sakhan ah CDF-Thantlang le CNA nih kan kah hna.Kawl ralkap 6 an thi i tampi hliamhma an pu. Kanmah lei Pathian thawng in him tein kan kir kho hna.” tiah CDF Thantlang nih nihin May 28 ah a thanh. Source: The Chin Post.

Chin Ramkulh Chung Pengkulh 7 Ah Sianginn Onnak SAC Nih A Tuah Lai!

2022-2023 cacawn kum ah Chin ramkulh chung pengkulh 7 ah sianginn honnak tuah a si lai. Cachimtu (saya/sayamah) thazaang nih a daih lo ruangah sianginn hon khawh lo mi hna cu khuate lei um cachimtu hna auh in hon an si lai, tiah Chin ramkulh Education department in ṭuanvo ngeitu pakhat nih a chim.“Sianginn i apnak cu May 27 in cohlan a si cang, sianginn aa apmi siangngakchia an tam a si ahcun khuate lei ummi cachimtu hna auh an si lai i, cu bantuk in kan tuah ahcun cachimtu i daih lo a um lai lo, a tlamtling ko lai. Hakha ah sianginn 6 on a si lai i, high school no. 1,2,3,4 lengah mu-lun(မူလွန်) sianginn 2 cu on a si lai. Hakha telh in peng 7 ah sianginn on a si lai, Kanpalet le Thantlang ah cun sianginn honnak kan tuah kho rih lai lo,” tiah Chin ramkulh Education department in ṭuanvo ngeitu pakhat nih a chim

Chim ramkulh Education department thanh bantuk in, Chin ramkulh chung ah Hakha, Falam, Tedim, Tonzaang, Palatwah, Mindat le Matupi tiin pengkulh 7 ah sianginn onnak tuah a si lai i, a taang mi pengkulh 2 Thantlang le Kanpalet ah cun sianginn onnak an tuah kho lai lo tiah theih a si. 2022-2023 cacawn kum sianginn kai ding min pek caan cu May 26 in June 1 tiang cohlan a si lai. Chin ramkulh chung ah sianginn aa apmi tlawmpal cu an um nain June 2 sianginn on ni ah cazin fiang deuh in theih a si te lai. Source: The Chin Post.