Ram Pasalttha “SNIPER” Nih Ram le Miphun Caah Anunnak Apek Ee!
Karenni ramkulh, Loikaw khuapi chung raldohnak ah KNDF pasaltha, Sniper pakhat nih ram le miphun caah a nunnak a pek than tiah theih asi. Pasaltha Sniper pakhat nih a nunnak apek than e tiah khuami sin in kan theih hi asi tiah Than Lwin Khet News nih a langhter.
Nihin ah a nunnak a pe mi KNDF pasaltha hi KNDF Tatzin 6 ah Sniper pakhat a si, SAC ralhrang Sniper he an i kahnak ah a nunnak a liam hi a si tiah an chim.
Hi pasaltha hi SAC ralhrang lei Sniper nih a kah mi ruang ah a nunnak a liam hi a si i atu zong raldohnak a um peng rih, an i kap cuahmah caah a dang hliamtuar le a thi mi kong fiang tein theih a si rih lo tiah theih asi.
Nihin zong Kawlram hmun tampi ah kahnak a chuak, SAC ralhrang lei a thi mi le hliamtuar an um len bantuk in mipi rungvengtu pasaltha lei zong a thi mi an umnak a um ve. SAC ralhrang lei nih biatak tein kahnak an kal pi cuahmah caah Sagaing ramthen, Chin ramkulh, Karenni State ti bantuk Loikaw khuapi chung tiang ah raldohnak aa peh cuahmah rih hi asi.
Credit: Laikokek Journal!
Relchap Ding:
Sagaing ramthen Tanhse khuapi ah SAC ralhrang bawmtu tiah ruahmi Shew Daung Min detsi/dizel dawr ngeitu cu Tanhse mipi ralkap nih nihin January 20 chun sml 1:00 ah luhhnawh in an kah that. SAC ralhrang nih i vennak caah an pekmi kutin sermi meithal zunkhat zong kan laakpiak tiah TPC nih cathanh a chuah.
Meithal kahnak a chuah hnuin Shew Daung Min detsi/dizel dawr cu mei nih a kang caah Tanhse palek sakhan ummi ralhrang pawl nih lampi ah aa chawkmi paoh cu checking an tuah tiah theih a si.
Nizan ah khan Sagaing ramthen Shewbu peng chung Pa Laing khua in a rak chuakmi ralhrang hna cu Than Taw khua pawngah Snake Eyes PDF Shewbu le C&T Shewbu phu nih bomb an rak puah hnawh caah ralhrang (10) lengkai an thi tiah theih a si.
Cupinah nihin chun zongah Ye U peng chung Htan Pin Kung khua pawngkam ah SAC ralhrang le Buesawtyi phu hna cu mipi ralkap fonhmi phu nih bomb an puah hnawh hna caah ralhrang (7) lengkai an thi tiah mipi ralkap nih cathanh an chuah tiin Khik Thit Media nih a tial.
Credit: The Federal Times!
Relchap Ding:
Tutan tluk in tlangcungmi lungrualnak a ṭhawn hi kan thei bal lo, cucaah cun tukum chung hrimhrim ah dohthlennak hi kan hlawh a tling ko lai tiah NUG Cozah Acting Prime Minister (vuancichoh) Mahn Win Khaing Than nih a chim.
PM Mahn Win Khaing Than nih cun “Tukum cu kan hlawhtling ko lai tiah ka ruah. Harnak a ummi hna hi kan lonh khawh ding hi a biapi. Atu bantuk caan hi kan tong bal lo. Atu bantukin tlangcungmi lungrualnak a um zong hi kan thei bal lo” tiah Myanmar Now he biaruahnak ah a chim.
NUG zong nih tlangcungmi hruaitu hna he biaruahnak ngeih in hnatlaknak tuah dingah an i zuam peng, zeimawzat an hlawhtling fawn cang. NUG nih tlangcungmi hna he biaruahnak le ceihkhannak an tuah khawh caah tlangcungmi lungrualnak a ṭhawn hi a si.
“Tukum hi kan luan lai lo. Mizapi zong an ba tuk cang. Caan a rauh tuk lonak dingah rianrang in lim dingah kan duh. Kan theih cio bangin kahdohnak ah kan hlawhtling deuh peng. Atu cu vanlawng in an kan kahnak hi zeitin kan tuah lai. Hi hna hi EAO nih ṭha tein ceihkhan a hau ding phun a si. Raldohnak vanlawng hi um hlah sehlaw fawi tukin kan tei cang hnga” tiah Mahn Win Khaing nih cun a chimchap.
Atu i dohthlennak cu mizapi le Generation Z hna nih tuahmi a si. NUG nih cun lam lawng a hmuhsak hna. Dohthlennak a tak in a hlawhtlin khawh nakhnga NUG zong nih a si khawh chungin an i zuam peng ko tiah PM Mahn Win Khaing Than nih a chi fawn.
Credit: The Chin Post!